ഒരു സങ്കീര്‍ത്തനം പോലെ

   വിശ്വസാഹിത്യകാരനായ ഫയോദര്‍ ദസ്‌തയേവ്‌സ്‌കിയുടെ ജീവിതം പ്രമേയമാക്കിക്കൊണ്ട് പെരുമ്പടവം ശ്രീധരന്‍ എഴുതിയ നോവലാണ് ഒരു സങ്കീര്‍ത്തനം പോലെ. 1994 ല്‍ പ്രീഡിഗ്രിക്ക് പഠിക്കാനുണ്ടായിരുന്ന നോവലാണ് 'കുറ്റവും ശിക്ഷയും' (Crime & Punishment). അന്നേ മനസ്സില്‍ കുടിയേറിയതാണ് അതിലെ കഥാപാത്രങ്ങളായ റാസ്‌ക്കള്‍ നിക്കോവും സോണിയയും പിന്നെ അവരെ സൃഷ്‌ടിച്ച ഫയോദര്‍ ദസ്‌തയേവ്‌സ്‌കിയും. ദസ്‌തയേവ്‌സ്‌കി എന്ന വ്യക്തിയുടെയും കലാകാരന്റെയും ജീവിതസംഘര്‍ഷങ്ങള്‍ തുറന്നുകാണിക്കുന്ന ഒന്നാണ് ഈ പുസ്തകം. തന്റെ മാസ്റ്റര്‍ പീസുകളില്‍ ഒന്നായ 'ചൂതാട്ടക്കാരന്‍' വേഗം എഴുതി മുഴുമിപ്പിക്കുന്നതിനായി ഒരു എഴുത്തുകാരിയെ - അന്നയെ- നിയമിക്കുന്നു. അന്നയും ദസ്‌തയേവ്‌സ്‌കിയും കണ്ടുമുട്ടിയതു മുതലുള്ള 27 ദിവസത്തെ ജീവിതമാണ് നോവലിലെ ഇതിവൃത്തം. വായിക്കുന്തോറും വീണ്ടും വീണ്ടും വായിക്കണമെന്നു തോന്നുന്ന വളരെ കുറച്ചു നോവലുകളില്‍ ഒന്ന്. ഒറ്റ ഇരുപ്പില്‍ തന്നെ വായിച്ച് തീര്‍ക്കാവുന്ന ഈ നോവലിന്റെ പ്രസാധകന്‍ ആശ്രാമം ഭാസിയാണ്.

Binoy Philip, HSA, GHSS Kottodi